– ५ जानेवारीला उच्च न्यायालयात आक्षेप नोंदवण्याची अंतिम संधी
लोकवृत्त न्यूज
गडचिरोली :- नायलॉन मांजामुळे होणारे प्राणघातक अपघात आणि मुक्या पक्ष्यांची होणारी कत्तल रोखण्यासाठी आता प्रशासनाने अत्यंत कठोर पाऊल उचलले आहे. नायलॉन मांजा वापरणाऱ्यांवर ५० हजार रुपये, तर विक्री करणाऱ्यांवर तब्बल २.५ लाख रुपयांचा दंड आकारण्याचे प्रस्तावित करण्यात आले आहे. उच्च न्यायालय, नागपूर खंडपीठाच्या निर्देशानुसार जिल्हादंडाधिकारी अविश्यांत पंडा यांनी यासंदर्भात सार्वजनिक सूचना जारी करून कडक कारवाईचे संकेत दिले आहेत.
प्रस्तावित दंडात्मक कारवाईनुसार, जर एखादा अल्पवयीन मुलगा नायलॉन मांजाने पतंग उडवताना आढळला, तर त्याच्या पालकांना ५० हजार रुपये दंड का करू नये, अशी विचारणा न्यायालयाने केली आहे. तसेच कोणतीही प्रौढ व्यक्ती नायलॉन मांजा वापरताना सापडल्यास तिला ५० हजार रुपये दंड भरावा लागेल. नायलॉन मांजाची विक्री करणाऱ्या किंवा साठा करणाऱ्या विक्रेत्यांवर सर्वाधिक कठोर कारवाई प्रस्तावित असून, त्यांना प्रत्येक उल्लंघनासाठी अडीच लाख रुपये दंड भरावा लागू शकतो.
नैसर्गिक न्यायाच्या तत्त्वानुसार, ही दंडात्मक कारवाई अंतिम करण्यापूर्वी न्यायालयाने जनतेला आपले म्हणणे मांडण्याची संधी दिली आहे. ज्यांना या प्रस्तावित दंडाबाबत आक्षेप किंवा निवेदन सादर करायचे आहे, त्यांनी ५ जानेवारी २०२६ रोजी मा. उच्च न्यायालय, नागपूर खंडपीठ येथे होणाऱ्या सुनावणीला उपस्थित राहावे. जर कोणीही सुनावणीला हजर राहिले नाही, तर जनतेचा या दंडास कोणताही आक्षेप नाही, असे गृहीत धरले जाईल. नायलॉन मांजावर पूर्णतः बंदी असून नागरिकांनी नियमांचे पालन करावे, अन्यथा कठोर कारवाईला सामोरे जावे लागेल, असा स्पष्ट इशारा जिल्हादंडाधिकारी अविश्यांत पंडा यांनी दिला आहे.
