गडचिरोलीत अवैध कोंबडाबाजारावर धाड : लाखोंचा मुद्देमाल हस्तगत
लोकवृत्त न्यूज
गडचिरोली :- जिल्ह्यातील ग्रामीण भागात गुपचूप भरविण्यात येणाऱ्या अवैध कोंबडाबाजारावर गडचिरोली पोलिसांनी मोठी धाड टाकली. रेगडी पोलीस ठाणे हद्दीतील मौजा गरंजी टोला येथे रविवार 21 सप्टेंबर रोजी पोलिसांनी अचानक कारवाई करून कोंबड्यांच्या झुंजींवर पैज लावणाऱ्या तब्बल 92 जुगाऱ्यांना ताब्यात घेतले. या धाडीत पोलिसांनी 46 मोटारसायकली, पाच चारचाकी वाहने, 31 मोबाईल फोन, 14 कोंबडे, पाच लोखंडी काती तसेच 42 हजार 950 रुपये रोख असा मिळून तब्बल 44 लाख 26 हजार 400 रुपयांचा मुद्देमाल पंचासमक्ष जप्त केला.
ही कारवाई सहाय्यक पोलीस अधीक्षक धानोरा अनिकेत हिरडे यांच्या नेतृत्वाखाली विशेष अभियान पथकाने केली. माओवादीविरोधी मोहिमेदरम्यान गरंजी टोला जंगल परिसरात संशयास्पद हालचाली व आरडाओरड ऐकू आल्यानंतर पोलिसांनी पाहणी केली असता कोंबड्यांची झुंज लावून जुगार खेळला जात असल्याचे स्पष्ट झाले. वरिष्ठांच्या आदेशानंतर पंचांच्या उपस्थितीत धाड टाकण्यात आली. अचानक धाड पडल्याने काही जुगारी पळून जाण्याचा प्रयत्न करत होते; मात्र पोलिसांनी शिताफीने पाठलाग करून सर्व 92 जणांना ताब्यात घेतले.
या प्रकरणी रेगडी पोलीस ठाण्यात गु.र. क्र. 26/2025 नोंदवून आरोपींविरुद्ध महाराष्ट्र जुगार अधिनियम कलम 12(ब) तसेच प्राण्यांवरील क्रूरतेस प्रतिबंध अधिनियम, 1960 अंतर्गत गुन्हा दाखल करण्यात आला आहे. पुढील तपास पो.उ.नि. कुणाल इंगळे करीत आहेत.
ही धाड पोलीस अधीक्षक नीलोत्पल, अपर पोलीस अधीक्षक (अभियान) एम. रमेश आणि अपर पोलीस अधीक्षक (प्रशासन) गोकुल राज जी. यांच्या मार्गदर्शनाखाली पार पडली असून, सपोनि. विश्वास बागल, पो.उ.नि. ज्ञानेश्वर धुमाळ, पो.उ.नि. देवाजी कोवासे यांच्यासह विशेष पथकातील अंमलदारांचा सहभाग होता.
#livenews #breakingnews #marathinews #latestnews #gadchirolinews #gadchirolipolice #gadchiroli #lokvruttnews #news #crime
