नागरिकांमध्ये सायबर सुरक्षिततेबाबत जागरूकता निर्माण करण्याचा उपक्रम
लोकवृत्त न्यूज
गडचिरोली, दि. १२ :- केंद्रीय गृह मंत्रालय आणि इंडियन सायबर क्राइम कोऑर्डिनेशन सेंटर (I4C) यांच्या मार्गदर्शनाखाली साजऱ्या होत असलेल्या ‘सायबर जनजागृती महिना – ऑक्टोबर 2025’ उपक्रमाअंतर्गत गडचिरोली पोलीस दलाच्या वतीने आज भव्य ‘सायबर जनजागृती सायकल रॅली’चे आयोजन करण्यात आले. पोलीस अधीक्षक नीलोत्पल यांच्या मार्गदर्शनाखाली ही सायकल रॅली पोलीस कवायत मैदान येथून सुरू होऊन ट्रेंड्स मॉल, धानोरा रोड मार्गे पार पडली. रॅलीत अपर पोलीस अधीक्षक (अभियान) एम. रमेश, अपर पोलीस अधीक्षक (प्रशासन) गोकुल राज जी., पोलीस उपअधीक्षक (अभियान) विशाल नागरगोजे यांच्यासह सुमारे 300 पोलीस अधिकारी व अंमलदारांनी उत्स्फूर्त सहभाग घेतला.
या रॅलीचा उद्देश नागरिकांमध्ये सायबर सुरक्षा, ऑनलाईन फसवणूक प्रतिबंध आणि डिजिटल साधनांचा सुरक्षित वापर याबाबत जनजागृती करणे हा होता. वाढत्या इंटरनेट वापरामुळे सायबर गुन्ह्यांचे प्रमाण वाढत असून, नागरिकांनी सतर्क राहून स्वतःची वैयक्तिक माहिती सुरक्षित ठेवणे अत्यावश्यक असल्याचे पोलिसांनी सांगितले. रॅलीचा समारोप शहीद पांडु आलाम सभागृहात करण्यात आला. या प्रसंगी पोलीस अधीक्षक नीलोत्पल यांनी उपस्थितांना सायबर गुन्ह्यांपासून सावध राहण्याचे आणि कोणालाही ओटीपी किंवा वैयक्तिक माहिती न देण्याचे आवाहन केले. तसेच सायबर फसवणुकीचा बळी पडल्यास त्वरित सायबर हेल्पलाईन क्रमांक 1930 किंवा 1945 वर संपर्क साधावा अथवा www.cybercrime.gov.in या संकेतस्थळावर तक्रार नोंदवावी, असेही त्यांनी सांगितले.
सायबर जनजागृती महिन्यात गडचिरोली पोलिसांच्या वतीने शाळा-महाविद्यालयांमध्ये जनजागृती कार्यक्रम, कार्यशाळा, ऑनलाईन वेबिनार्स तसेच सोशल मीडियावरील प्रचार मोहिमा राबविण्यात येणार आहेत. या उपक्रमाच्या यशस्वीतेसाठी स्थानिक गुन्हे शाखेचे पोनि. अरुण फेगडे, सायबर पोलीस स्टेशनच्या मपोउपनि. नेहा हांडे तसेच विविध शाखांचे अधिकारी आणि अंमलदार यांनी परिश्रम घेतले.
सायबर सुरक्षिततेसाठी प्रत्येक नागरिकाने दक्ष राहून या मोहिमेत सक्रिय सहभाग नोंदवावा, असे आवाहन गडचिरोली पोलिसांकडून करण्यात आले आहे.
@Gadchirolipolice #lokvruttnews @lokvrutt.com #crime #सायबर #cybercrime
