गडचिरोलीतून थेट ऑस्ट्रेलियात ; लॉयड्स मेटल्समुळे २४ विद्यार्थ्यांची शैक्षणिक झेप

गडचिरोलीतून थेट ऑस्ट्रेलियात ; लॉयड्स मेटल्समुळे २४ विद्यार्थ्यांची शैक्षणिक झेप

लोकवृत्त न्यूज
गडचिरोली दि.८ :- गडचिरोलीसारख्या दुर्गम व विकासाच्या मुख्य प्रवाहापासून दूर राहिलेल्या भागातील गुणवंत विद्यार्थ्यांसाठी जागतिक शिक्षणाचे दालन खुले झाले आहे. लॉयड्स मेटल्स अँड एनर्जी लिमिटेड (LMEL) यांच्या पुढाकारातून जिल्ह्यातील २४ विद्यार्थ्यांना ऑस्ट्रेलियातील पर्थ येथील नामांकित कर्टिन विद्यापीठात उच्च शिक्षणासाठी पूर्ण प्रायोजन देण्यात आले असून, हा उपक्रम जिल्ह्याच्या शैक्षणिक इतिहासातील मैलाचा दगड ठरत आहे.
कॉर्पोरेट सामाजिक जबाबदारीच्या चौकटीपलीकडे जात LMEL ने समाजघडणीचा नवा आदर्श निर्माण केला आहे. सुरजागड लोहखनिज खाणींचे पूर्ण क्षमतेने कामकाज सुरू झाल्यानंतर, व्यवस्थापकीय संचालक बी. प्रभाकरण यांच्या दूरदृष्टीतून औद्योगिक प्रगतीचा लाभ थेट स्थानिक युवकांपर्यंत पोहोचवण्याचा हा उपक्रम साकार झाला आहे.
४ मार्च २०२४ रोजी ‘अ‍ॅडव्हान्टेज विदर्भ’च्या समारोप समारंभात ग्रामीण महाराष्ट्राला आंतरराष्ट्रीय शैक्षणिक प्रवाहाशी जोडण्याचे दिलेले आश्वासन LMEL ने प्रत्यक्षात उतरवले आहे. दीर्घकाळ उग्रवादाने प्रभावित राहिलेल्या गडचिरोलीसाठी शाश्वत व सकारात्मक भविष्य घडवण्याच्या दिशेने हा उपक्रम महत्त्वाचा ठरत आहे.
सध्या बॅच १ व २ मधील १० विद्यार्थी कर्टिन विद्यापीठात अभियांत्रिकी व व्यवस्थापन विषयांचे शिक्षण घेत आहेत. आणखी १४ विद्यार्थ्यांना व्हिसा मंजूर झाला असून ते लवकरच ऑस्ट्रेलियात दाखल होणार आहेत. पदवी पूर्ण केल्यानंतर या विद्यार्थ्यांना LMEL मध्ये आंतरराष्ट्रीय दर्जाच्या पदांवर काम करण्याची संधी देण्यात येणार असून, पुढे कर्मचारी शेअर मालकी योजना (ESOP) अंतर्गत सहभागाचीही संधी उपलब्ध होणार आहे.
या उपक्रमाच्या निमित्ताने केंद्रीय मंत्री नितीन गडकरी आणि LMEL चे व्यवस्थापकीय संचालक बी. प्रभाकरण यांच्या हस्ते विद्यार्थ्यांना बोर्डिंग पास प्रदान करण्यात आले. यावेळी गडकरी यांनी या उपक्रमाचे कौतुक करत, भविष्यात गडचिरोलीमध्ये आंतरराष्ट्रीय दर्जाची विद्यापीठे उभी राहतील, असा विश्वास व्यक्त केला.

“लॉयड्स–कर्टिन पूर्णतः प्रायोजित शैक्षणिक कार्यक्रम” अंतर्गत विद्यार्थ्यांचे शिक्षण शुल्क, निवास, राहणीमान, प्रवास व प्रशासकीय खर्चाची १०० टक्के जबाबदारी LMEL उचलत आहे. कंपनी दरवर्षी प्रति विद्यार्थ्यांमागे सुमारे ५० लाख रुपये खर्च करत असून, एकूण गुंतवणूक प्रति विद्यार्थी १.५ ते २ कोटी रुपयांपर्यंत आहे.

लॉयड्स इन्फिनिट फाउंडेशनमार्फत राबविण्यात येणारा हा उपक्रम तळागाळातील गुणवंत विद्यार्थ्यांची निवड करून त्यांना जागतिक नेतृत्वासाठी सक्षम बनवण्यावर केंद्रित आहे. गडचिरोलीतील युवकांच्या भविष्यासाठी केलेली ही गुंतवणूक जिल्ह्याच्या विकासाला नवी दिशा देणारी ठरत आहे.