– चार शिकारी अटकेत, २२५ पक्षी, जाळी व शिकार साहित्यांसह आरोपींचा मुद्देमाल जप्त
लोकवृत्त न्यूज
सावली, ता. ७ नोव्हेंबर :- पक्षी सप्ताह साजरा होत असतानाच सावली वनपरिक्षेत्रात पक्ष्यांची मोठ्या प्रमाणावर शिकार केल्याचा प्रकार उघडकीस आला आहे. सावली वनपरिक्षेत्रातील व्याहाड उपवनक्षेत्र, नियतक्षेत्र सिर्सी येथील मौजा उमरी लगतच्या तलाव परिसरात रेशाळ कंठाची भिंगरी (Streak-throated Swallow) या संरक्षित प्रजातीच्या पक्ष्यांची शिकार करणाऱ्या गडचिरोली जिल्ह्यातील चार आरोपींना वनविभागाने रंगेहात पकडण्यात यश मिळवले.
शिकार प्रकरणातील आरोपी — लोमेश धोंडू गेडाम (३४), प्रताप बालाजी जराते (४५), अरविंद धोंडू गेडाम (३३) आणि मुखरू सखाराम मेश्राम (६५) — सर्व राहणार पारडी, जि. गडचिरोली — यांच्याकडून वनकर्मचाऱ्यांनी मोठा मुद्देमाल जप्त केला. जप्त केलेल्या वस्तूंमध्ये शिकारीत वापरलेल्या ८ जाळ्या, ५ थैल्या, ९ नायलॉन दोरीचे बंडल, १६ बांबू काठ्या, ८ लाकडी खुंट्या, तसेच २२५ मृत पक्षी आणि दोन मोटारसायकली (CB Shine MH-33/X-0113 आणि Bajaj Discover MH-33/L-3165) यांचा समावेश आहे.
पक्षी सप्ताह हा स्व. पद्मश्री मारोती चितमपल्ली (५ ऑक्टोबर) ते प्रख्यात पक्षीतज्ञ स्व. डॉ. सलीम अली (१२ ऑक्टोबर) यांच्या जयंतीनिमित्त दरवर्षी साजरा केला जातो. या काळात पक्ष्यांचे निरीक्षण आणि संवर्धनाचे उपक्रम राबवले जातात. मात्र याच काळात शिकार झाल्याने वनविभाग सतर्क झाला आणि सावलीतील वनकर्मचाऱ्यांनी तत्काळ धडक कारवाई केली.
या चारही आरोपींविरुद्ध वन्यजीव (संरक्षण) अधिनियम १९७२ अंतर्गत कलम ९, ३९, ४९, ५०, ५१ नुसार गुन्हा (क्र. 204/232851/2025) दाखल करण्यात आला आहे.
कारवाईत सावली वनपरिक्षेत्र अधिकारी विनोद धुर्वे, वनक्षेत्र सहाय्यक अनंत राखुंडे, वनरक्षक महादेव मुंडे, भोलेश्वर सोनेकर, एकनाथ खुडे, आर. एस. डांगे तसेच स्थानिक पीआरटी चमू व बिट मदतनीस यांचा सहभाग होता.
पुढील तपास विभागीय वनाधिकारी राजन तलमले आणि सहाय्यक वनसंरक्षक विकास तरसे यांच्या मार्गदर्शनाखाली वनपरिक्षेत्र अधिकारी विनोद धुर्वे करीत आहेत.
