नागपुरात ३६वा MEMC सप्ताह उत्साहात
लोकवृत्त न्यूज
नागपूर, दि. ०६ : नागपूर येथील हॉटेल रीजेंटा येथे ३६व्या मायन्स एन्व्हायर्नमेंट अँड मिनरल कन्झर्व्हेशन (MEMC) सप्ताहाचे भव्य आयोजन करण्यात आले. भारतीय खान ब्युरो (IBM) यांच्या मार्गदर्शनाखाली दरवर्षी आयोजित होणाऱ्या या प्रतिष्ठित कार्यक्रमात देशभरातील खाण उद्योगाशी संबंधित विविध भागधारक, तज्ज्ञ व अधिकारी सहभागी झाले होते. पर्यावरण संरक्षण, शाश्वत व जबाबदार खाणकाम तसेच खनिज संवर्धनासंदर्भातील उपक्रम आणि उत्तम पद्धतींचे सादरीकरण यावेळी करण्यात आले.
या कार्यक्रमात लॉयड्स मेटल्स अँड एनर्जी लिमिटेड (LMEL) यांच्या सुरजागड आयर्न ओअर माइन्सने फुली-मेकनाइज्ड ओपन कास्ट माइन्स या श्रेणीत संयुक्त द्वितीय पुरस्कार पटकावून राष्ट्रीय पातळीवर विशेष गौरव मिळविला. हा पुरस्कार अल्ट्राटेक सिमेंटच्या नाओकारी लाइमस्टोन माइन्ससोबत संयुक्तपणे प्रदान करण्यात आला. विशेष बाब म्हणजे हा सन्मान LMEL च्या महिला टीमने स्वीकारला असून खाण क्षेत्रातील महिलांचा वाढता आणि समावेशक सहभाग यामुळे अधोरेखित झाला.
कार्यक्रमास लॉयड्स मेटल्स अँड एनर्जी लिमिटेडचे वरिष्ठ अधिकारी, भारतीय खान ब्युरोचे अधिकारी तसेच विविध खाण संस्थांचे प्रतिनिधी उपस्थित होते. यावेळी LMEL कडून शाश्वत आणि पर्यावरणपूरक खाणकामाबाबतची आपली कटिबद्धता दर्शविणारे विविध उपक्रम सादर करण्यात आले. यामध्ये ग्रीन माइनिंग पद्धती, बँडेड हेमेटाईट क्वार्ट्झाईट (BHQ) चे बेनिफिशिएशन, स्लरी पाइपलाईन प्रकल्प, पेलेट प्लांटचे संचालन तसेच विविध कॉर्पोरेट सोशल रिस्पॉन्सिबिलिटी (CSR) उपक्रमांचा समावेश होता.
LMEL च्या सहभागाचे आणखी एक वैशिष्ट्य म्हणजे महिला कर्मचाऱ्यांचा वरिष्ठ अधिकाऱ्यांशी झालेला आत्मविश्वासपूर्ण संवाद. त्यांनी आपल्या कार्याचा आणि व्यावसायिक अनुभवांचा सविस्तर आढावा मांडत खाण उद्योगातील महिलांच्या भूमिकेवर प्रकाश टाकला. खाण क्षेत्रात समावेशकता व विविधतेला चालना देणाऱ्या त्यांच्या योगदानाचे उपस्थित अधिकाऱ्यांनी विशेष कौतुक केले.
३६व्या MEMC सप्ताहात सुरजागड आयर्न ओअर माइन्सने विविध क्षेत्रांतील उत्कृष्ट कामगिरीबद्दल अनेक पुरस्कार पटकावले. कमी दर्जाच्या खनिजांचे बेनिफिशिएशन व उपयोग तसेच वनीकरण या क्षेत्रांत प्रथम पुरस्कार, शाश्वत विकासासाठी द्वितीय पुरस्कार, पद्धतशीर व शास्त्रीय विकासासाठी तृतीय पुरस्कार, तर एकूण कामगिरीसाठी द्वितीय पुरस्कार मिळवून कंपनीने आपले नेतृत्व सिद्ध केले.
या यशाबद्दल अभिनंदन करत लॉयड्स मेटल्स अँड एनर्जी लिमिटेडचे व्यवस्थापकीय संचालक बी. प्रभाकरन यांनी कंपनीच्या हरित, स्वच्छ आणि शाश्वत खाणकामाच्या दृष्टीकोनाचे विशेष कौतुक केले. राष्ट्रीय स्तरावर लॉयड्सचे प्रतिनिधित्व करणाऱ्या महिला कर्मचाऱ्यांचे त्यांनी विशेष अभिनंदन करत महिला सक्षमीकरणाबाबत कंपनीची सततची बांधिलकी पुनः अधोरेखित केली. शाश्वत खाणकाम, पर्यावरण संरक्षण आणि जबाबदार संसाधन व्यवस्थापनात लॉयड्स मेटल्स अँड एनर्जी लिमिटेडची भूमिका पुन्हा एकदा अधोरेखित झाली आहे.
