एक दिवसात विक्रम : एलआयसीचा ‘मॅड मिलियन डे’ गिनीज वर्ल्ड रेकॉर्डमध्ये
लोकवृत्त न्यूज
मुंबई, दि.२४ :- भारतीय जीवनविमा क्षेत्रातील दिग्गज संस्था भारतीय आयुर्विमा महामंडळाने (एलआयसी) एक अनोखा विक्रम गाठला आहे. २० जानेवारी २०२५ रोजी आयोजित ‘मॅड मिलियन डे’ या दिवशी एलआयसीच्या एजंटांनी एका दिवसात विक्रमी संख्येने विमा पॉलिसी विक्री केल्या, ज्यामुळे त्यांना गिनीज वर्ल्ड रेकॉर्ड्स™ मध्ये नोंद मिळाली आहे.
या उपक्रमाची कल्पना आणि सूत्रसंचालन एलआयसीचे चेअरमन आणि व्यवस्थापकीय संचालक सिद्धार्थ मोहोन्ती यांनी केले होते. त्यांनी सर्व एजंटांना ‘मॅड मिलियन डे’च्या दिवशी किमान एक पॉलिसी पूर्ण करण्याचे आवाहन केले, ज्याला देशभरातून प्रचंड प्रतिसाद मिळाला. या ऐतिहासिक दिवशी लाखो एजंटांनी मिळून विक्रमी पॉलिसी विक्री करून नवीन कीर्ती रचली.
मोहोन्ती यांनी या यशाबद्दल व्यक्त करताना सांगितले, “गिनीज वर्ल्ड रेकॉर्ड्स™ कडून मिळालेली ही मान्यता म्हणजे आमच्या एजंटांच्या अथक परिश्रमाची, निष्ठेची आणि समर्पणाची जागतिक पातळीवरची मान्यता आहे. आम्ही आमच्या सर्व ग्राहक, एजंट आणि कर्मचाऱ्यांचे मनापासून आभार मानतो.”
एलआयसीने नेहमीच भारतीय कुटुंबांना आर्थिक सुरक्षेची हमी दिली आहे. ‘मॅड मिलियन डे’ उपक्रमाने या ध्येयाला नव्या उंचीवर नेऊन देशातील विमा क्षेत्राला जागतिक स्तरावर गौरव प्राप्त करून दिला आहे.
या विक्रमामुळे ‘टीम एलआयसी’मध्ये अभिमान आणि आनंदाचे वातावरण असून, ही कामगिरी फक्त एक दिवसाची यशोगाथा नसून, भविष्यातील आणखी मोठ्या प्रयत्नांची प्रेरणा ठरणार आहे.
#LIC #MadMillionDay #GuinnessWorldRecord #LifeInsurance #FinancialProtection #SiddharthaMohanty #TeamLIC #InsuranceRecord #IndiaInsurance #Vikrams @LOKVRUTTNEWS
