मुधोली चक नं. २ येथे भूसंपादन मोजणीला शेतकऱ्यांचा तीव्र विरोध, प्रशासनाला माघारी फिरावे लागले
लोकवृत्त न्यूज
चामोर्शी : चामोर्शी तालुक्यातील मुधोली चक नंबर २ येथे भूसंपादनासाठी जमिनीची मोजणी करण्याच्या प्रस्तावाला स्थानिक शेतकऱ्यांनी तीव्र विरोध दर्शविल्याने प्रशासनाला अखेर माघार घ्यावी लागली. हा प्रकार बुधवारी ११ मार्च २०२६ रोजी सायंकाळी सुमारे ५.३० वाजताच्या सुमारास घडला.
प्राप्त माहितीनुसार, परिसरातील शेतजमिनी भूसंपादनासाठी मोजणी करण्याच्या संदर्भात प्रशासनाच्या अधिकाऱ्यांची बैठक ग्रामपंचायत मुधोलीच्या आवारात आयोजित करण्यात आली होती. या बैठकीत भूसंपादन प्रक्रियेबाबत माहिती देऊन जमिनीची मोजणी करण्याचा प्रस्ताव प्रशासनाकडून मांडण्यात आला.
यावेळी तहसीलदार प्रशांत घोरुडे, एसडीओ अरुण एम., एसडीपीओ कोकाटे (अहेरी), एसडीपीओ नाईक (सिरोंचा) तसेच आष्टी पोलीस ठाण्याचे पोलीस निरीक्षक विशाल काळे यांच्यासह मोठ्या प्रमाणात पोलीस बंदोबस्त तैनात करण्यात आला होता.
मात्र, प्रशासनाचा प्रस्ताव मांडताच उपस्थित शेतकऱ्यांनी त्याला जोरदार विरोध दर्शविला. शेतकऱ्यांनी स्पष्टपणे सांगितले की, त्यांच्या कुटुंबाचा उदरनिर्वाह शेतीवर अवलंबून असून ही जमीन भूसंपादनासाठी दिल्यास त्यांचे आर्थिक व सामाजिक नुकसान होणार आहे. त्यामुळे कोणत्याही परिस्थितीत जमिनीची मोजणी करण्यास ते तयार नसल्याची ठाम भूमिका त्यांनी मांडली.
बैठकीदरम्यान काही काळ वातावरण तणावपूर्ण झाले होते. काही शेतकऱ्यांनी भावनिक प्रतिक्रिया देत प्रशासनाने जबरदस्तीने मोजणी करण्याचा प्रयत्न केल्यास सामूहिक आत्महत्येसारखा टोकाचा निर्णय घ्यावा लागेल, असा इशाराही दिला. त्यामुळे परिस्थिती अधिक गंभीर होण्याची शक्यता निर्माण झाली होती.
दरम्यान, स्थानिक ग्रामपंचायत पदाधिकाऱ्यांनीही शेतकऱ्यांच्या बाजूने भूमिका घेत प्रशासनाला विनंती केली की, शेतकऱ्यांच्या संमतीशिवाय कोणतीही मोजणी किंवा भूसंपादनाची प्रक्रिया राबवू नये. या पार्श्वभूमीवर प्रशासनाने त्या दिवशी जमिनीची मोजणी न करता माघार घेत परतण्याचा निर्णय घेतला.
या बैठकीस ग्रामपंचायत मुधोलीच्या सरपंच अश्विनी कुंभरे, उपसरपंच किशोर खामनकर, विनोद भोयर, सुरेश परसोडे, विनोद गौरकार यांच्यासह परिसरातील मोठ्या संख्येने शेतकरी उपस्थित होते. ग्रामस्थांनी एकमुखाने भूसंपादनाच्या प्रस्तावाला विरोध दर्शविला.
एकंदरीत, मुधोली चक नं. २ येथे भूसंपादनाच्या प्रस्तावावरून शेतकऱ्यांमध्ये तीव्र नाराजी दिसून येत असून पुढे प्रशासन या प्रकरणात कोणती भूमिका घेते याकडे परिसराचे लक्ष लागले आहे.
