आज गडचिरोली ‘नो-व्हेईकल झोन’; सायंकाळी ४ नंतर मुख्य मार्ग राहणार बंद
लोकवृत्त न्यूज
गडचिरोली, दि. १४ : भारतरत्न डॉ. बाबासाहेब आंबेडकर जयंतीनिमित्त गडचिरोली शहरात उत्सवाची जोरदार तयारी सुरू असून, मुख्य इंदिरा गांधी चौक परिसरात मोठ्या प्रमाणावर गर्दी उसळण्याची शक्यता आहे. या पार्श्वभूमीवर नागरिकांची सुरक्षितता आणि वाहतुकीची सुरळीतता कायम राखण्यासाठी जिल्हा प्रशासनाने १४ एप्रिल रोजी सायंकाळी ४ ते रात्री १२ वाजेपर्यंत शहरातील प्रमुख मार्गांवर कडक वाहतूक निर्बंध लागू करण्याचा निर्णय घेतला आहे.
या आदेशानुसार गडचिरोली–आरमोरी, चंद्रपूर, धानोरा आणि चामोर्शी या मार्गांवर दोन्ही बाजूंनी सर्व प्रकारची वाहतूक पूर्णतः बंद राहणार आहे. अवजड तसेच हलक्या वाहनांना शहरात प्रवेशास स्पष्ट मनाई करण्यात आली आहे.
जिल्हादंडाधिकारी अविश्यांत पंडा यांनी मोटार वाहन कायदा १९८८ मधील कलम ११५ व ११६ अंतर्गत अधिकारांचा वापर करून हा आदेश जारी केला आहे. मात्र, रुग्णवाहिका, प्रवासी बसेस तसेच पाणीपुरवठा, महावितरण, दूरसंचार आणि रस्ते दुरुस्तीशी संबंधित अत्यावश्यक सेवांना या निर्बंधातून सूट देण्यात आली आहे.
दरम्यान, आदेशाचे उल्लंघन करणाऱ्या वाहनधारकांवर भारतीय दंड संहिता १८६० व महाराष्ट्र पोलीस अधिनियम १९५१ अंतर्गत कडक कारवाईचा इशारा प्रशासनाने दिला आहे.
नागरिकांना आवाहन जयंती उत्सव निर्विघ्न आणि शांततेत पार पडावा यासाठी नागरिकांनी पर्यायी मार्गांचा वापर करावा व प्रशासनाला सहकार्य करावे, असे आवाहन करण्यात आले आहे.
